MAUBISSE, 29 novembru 2021 (TATOLI) – Banku Sentrál Timor-Leste (BCTL, sigla portugés), segunda ne’e selebra aniversáriu loron poupansa nasionál ba dahituk no selebra aniversáriu dahuluk ba programa nasionál kampu dijitál iha salaun parokiál postu administrativu Maubisse, munisípiu Ainaro.
Selebrasaun loron nasionál poupansa no kampu dijitál tinan ne’e halo ho mekanismu diferente. BCTL inisiativa lori programa literasia finanseira no sistema pagamentu dijitál ba eskola ensinu báziku lima iha Maubisse no ensinu superiór ida iha área eskola vokasionál agríkula Maubisse.
Hafoin vizita eskola ensinu baziku indikadu, BCTL realiza kompetisaun sertame hodi motiva estudante sira estuda matéria literasia finanseira dijitál.
Objetivu atividade ba selebrasaun loron poupansa nasionál nian mak habelar informasaun ba estudante EBC Rimor, EBC Aitutu, EBC Fleicha, EBC Beremoli, EBC Rita no Ensinu sekundáriu vokasionál agríkula Maubisse atu hatene benefísiu halo poupansa ho mekanismu tradisionál no modernu hodi prepara ba futuru.
Durante eventu, Vise-Governadora BCTL, Nur Aini Alkatiri, esplika programa kampu dijitál nu’udar programa nasionál ida-ne’ebé Banku Sentrál inísia hodi promove utilizasaun serbisu finanseira dijitál iha Timor-Leste.
Programa ida-ne’e mós ninia objetivu atu estende, iha médiu-longu-prazu, pontu asesu ba serbisu finanseira ida mak integrada no interligadu ne’ebé sei kobre área rurál sira.
Progresu durante implementasaun Programa Nasionál Kampu Dijitál (PNKD), kliente rejista hamutuk 754, merchant rejista hamutuk 26, ajensía rejista hamutuk 11 no hosi kliente, ajénsia no merchant sira iha leten balun ativu halo tranzasaun dijitál sira.
Totál tranzasaun eletrónika uza karteira eletrónika durante períodu ida-ne’e kuaze 3,500 tranzasaun nune’e BCTL apela ba instituisaun finanseira sira, liuliu banku komersiál no empreza Fintech sira hanesan Telemor Fintech no Tellin Digital Solution atu kontinua apoia ba komunidade iha Maubisse.
Nune’e mós, BCTL fahe sertifikadu agradesimentu ba ajente Banku Sentrál sira no ofisiál Governu lokál no asina nota entendimentu ho Sekretaria Estadu Kooperativa (SEKooP) ba formasaun literasia finanseira.
Durante eventu refere, Ajente BCTL, Wilson Nívio Mendonça atualiza Progresu Programa Nasionál Kampu Dijitál no Jeremias Obet Rahakbauw fahe esperiénsia kona-ba ulitizasaun pagamentu dijitál hosi ajénsia karteira eletrónika.
Ikus lius, BCTL mos entrega prémiu sertifikadu ba manán na’in kompetisaun sertame matéria literasia finanseira hosi primeiru to’o kintu ninian, no entrega sertifikadu apresiasaun ba eskola EBC lima no eskola vokasionál agríkula, Maubisse, ne’ebé kolabora implementa programa literasia finanseira dijitál iha sira-nian eskola.