Sua Exelençia Primeiro Ministro RDTL, Kay Rala Xanana Gusmão Lansa Projetu Rehabilitasaun Estrada Urbana Kapital Munisipio Ainaro

Ainaro : Sabado, 14 Fevereiro 2026 -Sua Exelençia Primeiro Ministro RDTL. Sr. Kay Rala Xanana Gusmão Akompanha husi Sua Exelençia Ministro Obras Pública , Sr. Samuel Marcal, Exelençia Presidente Autoridade Munisipio Ainaro Sra. Manuela Gerogina Carmo Bucar Corte-Real, Lansamentu Projetu Rehabilitasaun Estrada Urbana Kapital Munisipio Ainaro.

Sua Exelencia Primeiro Ministro RDTL, Kay Rala Xanana Gusmao, apela ba populasaun Munisipio Ainaro, liu-liu ba Joven sira atu akompanha servisu tomak, ba obra ida ne’e hodi garante Kualidade tanba osan ne’e Povu nian

“Ohin ita boot sira sai testamunha ba assinatura kontratu entre governo ho kompanha, tanba aban-bainrua estrada kuandu diak, Ainaro oan sira bele dezenvolve sira nia atividade ekonomiku. Komunidade tomak tenki partisipa ativa hodi fasilita servisu kompanha nian, no mos tau matan ba Kualidade projeitu ne’e. No husu ba Joven sira labele kria komflitu bebeik, maibe kaer liman hamutuk ba oin, hamutuk kontribui ba dezenvolvimentu”.

Iha fatin hanesan Sua Exelençia Ministro Obras Publika Samuel Marcal, garante katak estrada ne’e finaliza sei fasilita dunik populasaun bele transporta sira nia produtu lokal oi-oin ba Dili no Munisipio sira seluk

“Tanba ne’e, buat ne’ebe oras ne’e presiza tebes mak infraestrutura bazika liu-liu estrada, entaun bainhira hakarak estrada tenki koopera tanba tinan hirak liu ba, bainhira halo estrada tesi deit ai-hun ida, deskuti malu to’o tinan ha’at. Tanba ne’e husu ba inan Aman, Autoridade lokal atu bainhira hakarak dezenvolvimentu ne’e la’o lalais, ita tenki koopera, tanba uluk ita hateten katak ba rai ida ne’e ita nia vida mos hakarak fo ba mate, importante rai ida ne’e hetan ukun rasik a’an, maibe ohin loron ita atu fo rai metru ida ba Estadu atu halo estrada hodi ita la’o, mos diskuti naruk tebes. No ha’u fiar katak ho prezensa nian iha serimonia lansamentu ida ne’e, hatudu katak Ainaro-oan prontu simu Dezenvolvimentu. ho nune’e maka Governo lori kontratu mai assina iha serimonia lansamentu ne’e, para povu mak sai sasin ba assina kontratu governo no kompanha”.

Nune’e mos Exelencia Presidente Autoridade Munisipio Ainaro Sra. Manuela Georgina Carmo Bucar Corte-Real lori Populasaun Munisipio Ainaro Agradese ba IX governo Konstituisional no prontu koopera ba Dezenvolvimentu.

“Ha’u lori populasaun Munisipio Ainaro, agradese ba IX governo Konstituisional, no ami prontu koopera ba dezenvolvimentu. Ami kontenti, tanba konstrusaun infraestrutura bazika inklui rehabilitasaun Estrada urbana sei lori benefisiu, kresimentu ekonomiku ba atividade negosio ki’ik sira, haburas produtividade Munisipal no kriasaun empregu”.

Projetu rehabilitasaun estrada urbana munisipio Ainaro pakote I Package I.I -6.058.02 km sei konstrui husi kompanha Fortuna Start Unipessoal Lda. numeru kontratu SSS/009/MOP-2026, valor kontratu $4.324.875.82 ho durasaun fulan ne’en. No projetu Rehabilitasaun Estrada Urbana Munisipio Ainaro pakote II package I-6193.25 km sei konstrui husi Kompanha Riqueza Gavinto Unipessoal Lda. numeru kontratu SSS/010/MOP-2026, valor kontratu $4.324.875.82 ho duransaun fulan ne’en. No Tekniku Obras Publica, sei halo fizkalizasaun ba projetu rehabilitasaun Estrada Urbana Munisipio Ainaro.

Enkuantu iha atividade ne’e, partisipa husi membru do governo, Diretor Nasional, Secretario Munisipal, Diretor Servisu Munispal, Delagasaun Teritorial, Administrador Postu Administrativu sira, Lia-nain, Funsionario Publicu, Estudante no mos Povu Munisipio Ainaro.

Media PAM