DILI, 24 juñu 2021 (TATOLI)—Ministériu Interiór liuhosi Vise Ministru, António Armindo, hamutuk ho Portavóz Komandu Jerál Polísia Nasionál Timor Leste (PNTL), Superintendente Xefe Polísia, Arnaldo de Araújo, hala’o kampaña vasina kontra COVID-19 ba Komandu Polísia Postu Administrativu Maubisse, munisípiu Ainaro.

António Armindo husu ba membru PNTL iha postu administrativu ne’e ho família-sira koopera hodi tuir vasina atu bele hasa’e imunidade kontra COVID-19.

“Ha’u mai nu’udár membru komisaun ba elaborasaun no koordenasaun ba ezekusaun planu vasinasaun kontra COVID-19, hatutan mensajen hosi Primeiru-Ministru,” António Armindo hateten liuhosi komunikadu ne’ebé Agéncia Tatoli asesu, kinta ne’e.

Iha fatin hanesan, Komandante eskuadra  Maubisse, Inspetór Polísia, Afonso da Silva, agradese ba Governu no Komandu PNTL, ne’ebé kontinua alerta kona-bá serbisu ho profisionál no dixiplina, liuliu iha luta salva ema hotu hosi peste COVID-19.

Afonso da Silva informa katak, durante ne’e PNTL Maubisse serbisu di’ak tebes ho Ministériu Saúde, hodi sosializa regra saúde-nian, inklui koopera hodi partisipa iha programa vasina.

“Ami nia membru-sira iha eskuadra Maubisse ho membru Ofisiál Polisia Suku (OPS) iha suku sia hanesan Maulau, Manelobas, Liurai, Horaiquik, Aitutu, Edi, Fatubesi, no Maneto simu ona vasina ba dala rua no ami sei hatutan mensajen ne’e ba to’o komunidade,” nia promete.

Hafoin hala’o tiha enkontru, Governante ne’e ho Portavós PNTL hamutuk ho ekipa kontinua kedan halo sosializasaun ba komunidade iha merkadu lokál no restaurante ne’ebé lokaliza iha suku Maubisse-vila.