Ainaro : Sexta-Feira, 08 de Maio de 2026

Universidade da Paz (UNPAZ), liu husi Koordenador Programa Pratika Aprendisajen Kampu (PAK) entrega Estudante hamutuk 133 ba Exelencia Presidente Autoridade Munisipio Ainaro hodi Koloka ba Postu Administrativu Ainaro, Hato-Udo, Hato-Builico no Maubisse, hodi hala’o pratika no peskiza durante Fulan Ida.

Exelencia Presidente Autoridade Munisipio Ainaro Sra. Manuela Georgina Carmo Bucar Corte-Real, Agradese ba UNPAZ no Dosente sira, tanba nafatin fo mai Munisipio Ainaro, hanesan fatin no peskiza ba estudante sira.

“Tanba Pratika no peskiza ne’e importante tebes ba estudante sira atu adapta ho kondisaun Moris Komunidade sira nian. Tanba materia saida maka ita aprende iha sala laran, sei iha valor boot liu, bainhira aplika iha Situasaun real iha Komunidade ho seriedade hodi identifika ba saida mak povu sira hasoru”.

Nune’e mos Exelencia Presidente Autoridade Munisipio Ainaro husu ba Estudante Estajiadu sira, atu identifika potensialidade no problema ne’ebe mak Komunidade sira hasoru iha baze. Nune’e bele ajuda Autoridade hodi tau konsiderasaun iha Prosesu ba Planu Dezenvolvimentu Munisipal iha Futuro.

” Ita boot sira tenki hatudu atitudi diak iha Komunidade nia le’et, respeita imi nia a’an, Autoridade lokal no Komunidade sira, atu nune’e bele evita problema ou komflitu”.

Entertantu Estudante Estajiadu ne’e kompostu husi Fakuldade Ciensia Sociais e Humanos, Ekonomia, Direitu, Saude Publiku, Teknologia Agrikola, Engenaria no Ciencias Mericas

Fontes : Media PAM